每個寶寶的成長發展都各有不同，最重要是家長要了解幼兒成長的進程，以及仔細觀察寶寶的發展。有家長於加固分享專頁帖文，指1歲寶寶不肯自己坐定定進食，計劃實行斷奶斷水逼BB就範，唯擔心BB會否餓死而徵詢網友意見，結果招致網友圍攻！
Facebook《生仔要考牌系列》專頁帖文，轉發一個寶寶加固專頁的家長post，指寶寶1歲不肯進食固體食物個多星期，每次坐進餐椅便大哭，已試過多款他喜愛的食物，但有時肯吃，有時不肯吃。
該媽媽更表示，現在出動爸爸抱住，媽媽逐樣食物遞去寶寶手上才肯吃少許，每次要抱近一小時，由於爸爸要上班，所以無可能每餐也由爸爸抱住吃。
她表示：「有人話因為打1歲針/出牙所以寶寶無胃口，但我覺得唔係一個藉口俾佢一坐低就發癲，餓就要自己乖乖坐低拎野食。」
「而家打算cut晒所有奶，都唔會再主動餵水，但會放水壺係佢附近（bb未識自己飲水，唔識用任何杯同水壺，要我餵，唔知係咪有我餵慣水，所以連自己食野既動力都無左），逼佢一定要乖乖坐餐椅食飯」
最後該媽媽問：「想問下有冇人試過bb咁樣唔食唔飲一日ok嗎？我可以好忍心，最驚係咁樣餓死左佢，我變左殺人兇手，所以想問問大家意見，謝謝！」
有關帖文引來網民家長極大迴響，大家都質疑該媽媽的手法太過極端，「一歲BB你想佢點？其實佢咁固執的性格，都有點似你。你不如將心比心個女。用佢個角度看事情，唔好一味用你自己角度看事情啦。」
版主媽媽回應網民表示：「我只係唔餵水，唔係唔比水，會照放水壼係佢附近，但佢識唔識飲/飲唔飲到就要靠佢自己啦……鬼叫佢咁蠢唔識自己飲水？」
網民質疑版主媽媽的回應：「唔通你又一出世識自己食嘢飲水？BB咁細係咩都需要指導先學得好，你當佢係狗，肚餓就識搵嘢食咩？」
結果版主的回應可謂震驚所有網民：「我真係當佢狗咁養，我由6個月開始日日都教佢，但佢根本好多時都唔望人，狗可能仲易教過佢。」
網民的回應是：「好一句『我真係當狗咁養佢』！但bb好可憐， 有佢咁既媽媽」、「會唔會係因為你蠢，所以個BB先會蠢。每個小朋友都有自己嘅成長線，做人阿媽連少少耐性都冇，生仔真係要考牌，害咗下一代。」、「個媽媽當個囡係泰生咁養？？咁不如擺埋飯兜同水兜」
對於版主的回覆，有好心網民提醒她：「如果1歲大亦唔望人，不懂自己拿杯喝水，可能是有發展遲緩，家長要留意。」、「對比其他身邊既同齡小朋友，自己嗰個小朋友發展緩慢，做呀媽當然會心急慢慢就無咩耐性，媽媽要注意心理健康，小朋友最好都帶比醫生睇睇。調節下自己既expectation（期望）。而作為有正常小朋友的媽媽，唔教佢就出少句聲啦，針唔拮到肉講咩都係廢話。」
其實每個寶寶的成長發展均有不同，家長亦可參考美國註冊營養師杜怡琛的意見，替寶寶進行加固的5大禁忌，了解寶寶的成長需要。
Source by 生仔要考牌系列
Text by Parents Concept
